आरक्षण फाईलची पूर्तता करा अन्यथा राज्यभर मंत्र्यांना काळे फासण्याचा ईशारा
धोबी समाजाचे काळे निवेदन देत निषेध आंदोलन
धोबी समाजाला हक्काच्या आरक्षणापासून राज्याचा सामाजिक न्याय विभाग वंचित ठेवत असल्याने आज सोमवार (२४ ऑगस्ट रोजी) महाराष्ट्र राज्य परीट धोबी सेवा मंडळाच्या वतीने संपूर्ण राज्यभर काळ्या फिती व काळे मास्क लावून काळेच निवेदन देत राज्याच्या सामाजिक न्याय व विशेष सहाय्य विभागाचा निषेध म्हणून आंदोलन करण्यात आले.
राज्यातील धोबी समाजाला गेल्या २५-३० वर्षांपासून राज्याच्या सामाजिक न्याय विभागाने हेतूत: चालवलेल्या टाळाटाळीचा व चुकीचा प्रचंड मनस्ताप सहन करावा लागत आहे.सामाजिक न्याय विभागाचे विशिष्ट अधिकारी धोबी समाजाचा आरक्षण प्रस्ताव केंद्राला मुद्दाम सदोष
व त्रुटीपूर्ण पाठवत असल्याचे वारंवार दिसून आले आहे. त्यामुळे काळे आंदोलन करण्याची वेळ आल्याचे नमूद करत सामाजिक न्याय व विशेष सहाय्य विभागाचे मंत्री धनंजय मुंडे यांना दिलेल्या निषेध निवेदनात महिनाभरात मागणीची दखल घ्या अन्यथा महाविकास आघाडीच्या मंत्र्यांना काळे फासून आमच्या समाजावर झालेल्या अन्यायाचा उद्रेक जाहीर करण्यात येईल असा इशारा देण्यात आला आहे.
समाजाचे राष्ट्रीय अध्यक्ष बालाजीराव शिंदे व प्रदेशाध्यक्ष विवेक ठाकरे यांच्या नेतृत्वात झालेल्या आजच्या आंदोलनात सर्वांनी भाग घेतला होता.