अभिनेता आणि उद्योगपती सचिन जोशीला सक्तसवसुली संचलनालयाने अटक केली



मुंबई - अभिनेता आणि उद्योगपती सचिन जोशीला सक्तसवसुली संचलनालयाने अटक केली आहे. सचिन हा गुटखा किंग म्हणून ओळखले जाणारे जगदीश जोशी यांचा मुलगा आहे. त्याच्यावर आर्थिक गैरव्यवहार केल्याचे आरोप आहेत. ओमकार ग्रुप प्रमोटर्स आणि सचिन जोशी यांनी तब्बल 100 कोटींचा गैरव्यवहार केला होता. या प्रकरणी 18 तास चौकशी केल्यानंतर अटकेची कारवाई करण्यात आली.

सचिन हा एक प्रसिद्ध उद्योजक देखील आहे. विजय मल्ल्याचा गोव्यामधील किंगफिशर व्हिला खरेदी केल्यामुळे तो व्यावसायिक म्हणून पहिल्यांदा प्रकाशझोतात आला होता. याशिवाय देशभरात त्याचे अनेक रेस्तरॉं आणि क्‍लब आहेत. 100 कोटींच्या गैरव्यवहार प्रकरणी सचिनला ईडीकडून समन्स बजावण्यात आले होते.मात्र समन्स बजावल्यानंतही सचिन जोशी ईडी कार्यालयात हजर झाला नव्हता. यानंतर त्याला चौकशीसाठी दक्षिण मुंबईतील कार्यालयात आणण्यात आले. तेथे 18 तास त्याची चौकशी करण्यात आली. परंतु अपेक्षित उत्तरं न दिल्यामुळे अखेर ईडीने त्याला अटक केली. त्यानंतर ईडीच्या विशेष न्यायालयात हजर केले असता 18 फेब्रुवारीपर्यत कोठडी सुनाविण्यात आली आहे.


दरम्यान, ईडीने ओमकार ग्रुपचे चेअरमन कमाल गुप्ता आणि व्यवस्थापकीय संचालक बाबूलाल वर्मा यांना मनी लॉण्डरिंग प्रकरणी अटक केली आहे. झोपडपट्टी पुनर्विकास प्रकल्पांमध्ये सहभागी असलेल्या अनेक मोठ्या कंपन्यांपैकी ओमकार ग्रुप एक आहे. याशिवाय मुंबईत अनेक मोक्‍याच्या ठिकाणी ओमकार ग्रुपचे प्रकल्प सुरु आहेत.



Post a comment

0 Comments